Estrenu de La Reina la Guapura de Leenane

Esti 21 d'agostu de 2021, énte'l refalfiu y el desánimu que carez la sociedá y el gremiu por cuenta la pandemia, la compañía decide armase de valor y encarar esti grandísimu testu y percomplicáu trabayu. 

El Teatru Xovellanos de Xixón enfótase en nós pa esta empresa, y van echase dos funciones, el 21 y el 22 d'agostu, arrodiaos de les másimes midíes de seguridá anticovid. 

El testu, que tien recibío numberosísimos premios, y que plantega una historia que ta ambientada nun pueblu de la Irlanda Atlántica, ye de Martin McDonagh, ún de los más cimeros representantes de movimientu In-yer-face, que desendolca principios asemeyaos al llamáu Teatru de la Crueldá.

El repartu de la obra confórmenlu Izar Gayo, Inma Rodríguez, Carlos Alba y Diego Lombardía. La escenografía ye de Klara Konkoly-Thege, y la torna y la direición ye responsabilidá d'Antón Caamaño.

El montaxe encaróse ensin sofitu institucional nengún, magar que gocia dende'l mes de payares d'una pequeña ayuda de la FMCE y UP de Xixón pa la so puesta n'escena.