Izar Gayo y Klara Konkoly-Thege galardonaes nos Premios oh! d'AAEE 2021

En Producciones Nun Tris tamos percontentes de qu’a les nueses dos compañeres, Klara Konkoly ya Izar Gayo se-yos galardonara colos Premios Oh! 2021 a la meyor escenografía y a la meyor intérprete femenina respeutivamente, pol so trabayu nel montaxe “La reina la guapura de Leenane”. Ye una perbona noticia y dexa asoleyar munches coses, pero sedría inxusuto que la compañía-yos robare planu a les premiaes. Namái que vamos solliñar que, si nun nos confundimos, ye la primer vegada qu’una obra n’asturianu lleva dalgún premiu, del tipu que seya, dientro los Premios Oh! a lo llargo de les sos dolce ediciones. Únicamente Carlos Alba, que por cierto, tamién forma parte del equipu d’esti montaxe, foi nomináu pa un premiu pol “Llázaru de Tormes” va unos años.

 

Ye la primer vez que trabayamos con Klara. Ye verdá que nos movemos n’ámbetos cercanos y que tenemos munches persones en común, pero nunca coincidió. Ella reside n’Asturies va unos años, ye artista plástica y tien formación n’escenografía, una xera qu’equí n’Asturies nun ye cenciello exercer. Les condiciones nes que se desendolca’l trabayu de les compañías profesionales son tan sumamente precaries, que nun dexa que surdan munchos trabayos escenográficos de relieve, a nun ser n’otros ambetos escénicos como la ópera o grandes montaxes. A lo llargo d’esti viaxe en común hebio momentazos guapos, como cuando vimos la maqueta la escenografía, el primer ensayu al que asistió en La Laboral, el día de compres en leroy merlin y centro reto, o el treslláu dende Bimenes al teatru con una furgoneta onde nun entraba’l material. La escenografía axústase a lo que pide l’autor; ye un testu casi hiperrealista, percodificáu, con aiciones precises, onde nun pue haber munches invenciones. Sicasí, la escenografía tien que tresmitir daqué, tamién ye un llinguaxe escénicu. Nesi sen, Klara aporta un toque personal, funcional y artísticu; un espaciu zarráu y arrequexáu na inmensidá, pero abiertu a la mirada del mundu; la testura de les paredes, inspirada nos líquidos y fluidos que tienen presencia nel testu; la combinación de materiales d’estremada naturaleza qu’algamen una unidá perfeuta. Nun ye cenciello, y allégranos muncho coincidir y que se reconoza’l so trabayu. Prestaríanos qu’hubiera más oportunidaes de siguir trabayando xuntos. Felicidaes.

 

La rellación de la compañía con Izar yá vien dende va tiempu. Conocímosnos na nuesa época de formación, y á d’aquella hebio dalguna colaboración pa talleres y muestres. Artista polivalente, inquieta y tenaz, lleva esbrexando munchu tiempu p’abrir un camín mui bayurosu y mui personal d’esfuerzu, d’investigación y de profesión. Esa bayura de recursos permitió que nos obsequiara con una maxistral interpretación, yá va años, d’un de los personaxes centrales na versión n’asturianu de la comedia “El criáu de dos amos” de Carlo Goldoni, un clásicu de la Commedia de’ll Arte dirixíu por Inma Rodríguez y estrenada xusto güei (27 de marzu) va once años. Trabayó tamién nel espectáculu “Un viaje al exterior”, dirixíu por Lara Herrero, pa públicu infantil, y yá más tarde, amás de dalguna intervención n’escenificaciones puntuales (alcuérdome d’una mui especial na Escuela d’Inxenieros de Xixón, tamien xunta Inma), actúa nel montaxe de danza-teatru Aire! -un de los trabayos de los que más arguyosos tamos nesta compañía.

Talamente paez que "La reina la guapura de Leenane" ta escrita pa ella. Nun ye un personaxe nada cenciellu de sacar alantre; complexu, intensu, desixente... Sicasí, nada se pon per delantre de l'actriz pa encaralu. Desendolca un trabayu precisu, profundu, y arriesgáu. Dende llueu, la bayura de recursos interpretativos de l'actriz lo permite, y pa quien trabaya con ella dende fuera ye un luxu poder somorguiase nesi procesu. Felicidaes. 

Por parte de la compañía, dicir namás que préstenmos abondo los reconocimientos de la profesión, porque se trata de un trabayu arriesgáu --y más nestos tiempos-- y porque tol procesu, un placer,  foi un exemplu de voluntá y profesionalidá. Gracies a les dos y al restu del equipu por apostar por nós.