"La reina la guapura de Leenane" galardonada nel V Premiu Nel Amaro

La compañía Nun Tris resultó ganadora de la quinta edición del Premiu Nel Amaro de Teatru Profesional, que concede la Conseyería de Cultura, Política Llingüística y Turismu, pola obra La reina de la guapura de Leenane'. El Nel Amaro ta dotáu con 6.000 euros.

El xuráu encargáu de valorar les obres finalistes, que se reunió baxo la presidencia d'Antón García, director xeneral de Política Llingüística, tuvo integráu por María Cotiello, actriz y filóloga; Pilar Fernández, escritora y filóloga; Mar Friera, filóloga y profesora; Chechu García, escritor y profesor; y Eva Vallines, actriz y crítica teatral. Actuó como secretaria Laura Marcos, filóloga adscrita a la Dirección Xeneral de Política Llingüística.

El xuráu decidió conceder el premiu a La reina de la guapura de Leenane por ser «un apueste pol teatru contemporaneu». Nel acta del gallardón, los miembros del xuráu destaquen tamién que la obra «brilla en tolos aspectos: repartu, dirección, puesta n'escena, testu y traducción, y que nos enfrenta con una problemática irlandesa d'emigración, conflictu llingüísticu y d'identidá que s'afaya mui bien a la nuestra tierra».

El montaxe, que tan sólo disfrutó d'una pequeña ayuda del Conceyu de Xixón pa que fuera posible la so puesta n'escena, ya recibiere dos Premios Oh! esti añu 2021, a la meyor actriz (Izar Gayo) y a la meor escenografía (Klara Konkoly-Thege), siendo la primer vez qu'una obra n'asturianu recibe esti tipu de galardones dende qu'entamaron a cellebrase los Premios Oh!